САРДОРИ МАТБУОТИ ХАДАМОТИ ГУМРУКИ ҶТ САХТ МАҶРУҲ ШУД

             Душанбе, 28  ноябр. (АМИТ «Ховар», Мавҷуда  Давлатзода). – Сардори  дафтари матбуоти  Хадамоти  гумруки  назди  Ҳукумати  ҷумҳурӣ  Абдурасул  Шарифов   шаби  24  ноябр  дар  кӯчаи  Бобоҷон  Ғафурови  ноҳияи  Исмоили  Сомонӣ  бар  асари  фалокати  нақлиёт  сахт  маҷрӯҳ  шуд. Муовини  сардори Хадамоти  гумруки  ҷумҳурӣ  Неъматбой  Раҳматов ба АМИТ «Ховар»  хабар  дод, ки  А.Шарифовро  зимни  гузаштан  аз  роҳ  мошини  сабукрави «ВАЗ – 21006» пахш  кардааст.  Онро ронанда Давронбек  Умурзоқов  идора мекард. А.Шарифов  фавран  ба  шифохонаи  ҷумҳуриявии  клиникии  ба  номи  Дяков  оварда шуд. Дар  натиҷаи  таҳқиқи  духтурон  муайян  карда  шуд, ки  косахонаи  сари   А.Шарифов  сахт  маҷрӯҳ  гардидааст. Духтурон  25  ноябр  ӯро  ҷарроҳӣ  намуданд. Бемор  айни  ҳол  дар  ҳолати  беҳушӣ  қарор   дорад. Духтурон хабар   доданд, ки  аҳволи  саломатии ӯ  ниҳоят  вазнин  мебошад.