ШАРТНОМАҲОИ «ТОҶИКХОРИҶАКОР» БО ДАВЛАТҲОИ ХОРИҶ БА 42 АДАД РАСИДААСТ

Душанбе, 18 ноябр. (АМИТ «Ховар», Лаззат Диловарзод). – Дар давоми нӯҳ моҳи соли ҷорӣ зиёда аз 70 ташкилоту муассисаи хориҷӣ барои кор ба Корхонаи воҳиди давлатии «Тоҷикхориҷакор» — и Вазорати меҳнат ва ҳифзи иҷтимоии аҳолии Тоҷикистон дархост фиристодаанд. Шумораи шартномаҳои амалкунандаи корхона бо давлатҳои хориҷ то имрӯз ба 42 адад расидааст. Дар давоми соли ҷорӣ Корхонаи воҳиди давлатии «Тоҷикхориҷакор» зиёда аз 3 ҳазор шаҳрвандро қабул намуда, оид ба пайдо кардани кор дар хориҷи кишвар маслиҳатҳо дода, ҷойҳои кори холии мавҷударо ба онҳо пешниҳод намуд. Новобаста аз он, ки масъалаи муҳоҷирати меҳнатӣ ба зиммаи Вазорати корҳои дохилии Тоҷикистон вогузор шудааст, дар корхонаи мазкур 970 нафар шаҳрванд номнавис шудаанд.