СУРЪАТИ МАБЛАҒГУЗОРӢ МИЁНИ КИШВАРҲОИ ИДМ ДАР ТОҶИКИСТОН ТЕЗТАР АСТ

                Душанбе, 13 ноябр. (АМИТ «Ховар», Бекназари Абӯбакр). — Миёни кишварҳои аъзои Иттиҳоди Давлатҳои Мустақил суръати баландтарини маблағгузорӣ ба сармояи асосӣ дар Тоҷикистон ба қайд гирифта шудааст. Дар ин хусус сомонаи интернетии Кумитаи омори ИДМ иттилоъ додааст.              Дар моҳҳои январ-сентябри соли ҷорӣ ҳаҷми чунин намуди маблағгузорӣ дар Тоҷикистон нисбат ба ҳамин давраи соли гузашта ба андозаи 77,5 дарсад афзудааст, ки 70 дарсади онро маблағгузориҳои хориҷӣ ташкил медиҳанд.               Хабар дода мешавад, ки чунин афзоиш дар Тоҷикистон аз ҳисоби сармоягузориҳо ба сохтмони нерӯгоҳҳои барқӣ ба амал омадааст. Ин нишондиҳанда дар Озарбойҷон ба 38, Белорус — 23, Ӯзбекистон — 19, Россия — 13,1, Арманистон — 12, Молдова — 9 ва Украинаву Қазоқистон ба 8,2 баробар аст.             Лозим ба ёдоварист, ки то 1-уми октябри соли ҷорӣ сабади лоиҳаҳои инвеститсионии мамлакат аз 53 лоиҳаи алоҳида иборат буда, маблағи умумии он зиёда аз 5,1 миллиард сомониро ташкил медиҳад.            Таркиби сабади лоиҳаҳои инвеститсионии давлатӣ зиёда аз 17 соҳаи мухталифи хоҷагии халқро дар бар гирифта, 74,8 фоиз маблағҳои қарзӣ, 13,5 фоиз маблағҳои грантӣ, 11,7 фоиз ҳиссаи Ҳукумати Ҷумҳурии Тоҷикистон ва ҷамоатҳо мебошад.