ТАРКИШИ ПАГОҲИРӮЗӢ ДАР ДУШАНБЕ ВА ДУ ЗАНИ ОСЕБДИДА

         Душанбе, 20 ноябр. (АМИТ «Ховар», Анварбек Сиддиқов).- 20-уми ноябр, соати 7-у 32 дақиқа дар шаҳри Душанбе, дар бинои Рӯдакӣ 931, ҳуҷраи 36, ошёнаи сеюм таркиши гази табиӣ ба вуқӯъ пайваст. Тавре ба АМИТ «Ховар» нозири назорати давлатии бехатарии сӯхтори ноҳияи Исмоили Сомонии пойтахт Исмоилов Хусрав иттилоъ дод, баъд аз 6 дақиқаи таркиш кормандони онҳо дар ҷои воқеа ҳозир шуда, сӯхтори баамаломадаро хомӯш намудаанд. Ду зан, ки осеб дида буданд, ба Маркази ҷумҳуриявии беморони сӯхтаи шаҳри Душанбе фиристода шуданд.         Ӯ инчунин зикр намуд, ки дар натиҷаи таркиш ҳуҷраҳои 33 ва 39-и бинои номбурда камтар осеб дидаанд. Сабабҳои рух додани таркиш ва хисороти расида аз ҷониби сохторҳои масъул муайян карда мешавад.         Тибқи иттилои сардори Шӯъбаи тандурустии шаҳри Душанбе Абумуслим Темуров, зарардидагон Валентина Гердейи 74-сола ва Марина Клейменоваи 49-сола мебошанд. «Ҳоло мо тамоми чораҳоро меандешем, то ин ду занро наҷот диҳем»,- мегӯяд ӯ.