ТОҶИКИСТОНУ ЧИН АЗ АНДОЗБАНДИИ ДУКАРАТА КАНОРАГИРӢ МЕНАМОЯНД

          Душанбе, 18 ноябр. (АМИТ «Ховар», Марзия Саидова).- Лоиҳаи Қонунҳои Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи геодезия ва харитасозӣ», «Дар бораи вазъи ҳуқуқии шаҳрвандони хориҷӣ дар Ҷумҳурии Тоҷикистон», «Дар бораи бақайдгирии давлатии асноди ҳолати шаҳрвандӣ», «Дар бораи боҷи давлатӣ», «Оид ба лоиҳаи Қонуни Ҷумҳурии Тоҷикистон «Дар бораи донории хун ва ҷузъҳои он» аз масъалаҳое буд, ки дар ҷаласаи Шӯрои палатаи поёнии парлумони мамлакат баррасӣ гардид. Роҷеъ ба масъалаҳои зикршуда раиси Кумитаи Маҷлиси намояндагон оид ба масъалаҳои аграрӣ ва шуғли аҳолӣ Акрамшо Фелалиев ва мудири шӯъбаи ҳуқуқи палатаи поёнии парлумон Шарофиддин Зоиров ибрози назар карда, афзалияти онҳоро шарҳ доданд. Аз Маҷлиси намояндагон ба АМИТ «Ховар» иттилоъ доданд, ки аъзои Шӯро ҳамчунин масъалаи тасдиқи Созишномаи Ҳукумати Ҷумҳурии Тоҷикистон ва Ҳукумати Ҷумҳурии Мардумии Чин оид ба канорагирӣ аз андозбандии дукарата ва пешгири намудани саркашӣ аз супоридани андозҳо аз даромад ва сармояро баррасӣ карданд.