ТОҶИКОНУ ХОРИҶИЁН МУҚОБИЛИ ХАРИДУ ФУРӮШИ ОДАМОН МУБОРИЗА МЕБАРАНД

         Душанбе, 17 ноябр. (АМИТ «Ховар», Мавҷуда Давлатзода). — 19-уми ноябри соли ҷорӣ дар толори хурди Ҳукумати Ҷумҳурии Тоҷикистон бо раисии мудири Шӯъбаи мудофиа ва тартиботи ҳуқуқӣ Рамазон Раҳимов маҷлиси навбатии Комиссияи байниидоравии мубориза ба муқобили хариду фурӯши одамон доир мегардад. Аз Дастгоҳи иҷроияи Президенти Ҷумҳурии Тоҷикистон ба АМИТ «Ховар» хабар доданд, ки дар кори ҷаласа аъзоёни Комиссияи байниидоравӣ ва роҳбарони гурӯҳҳои корӣ, ки бо қарори маҷлиси Комиссияи байниидоравӣ аз 12-уми апрели соли 2008 (№7) таъин шудаанд, ширкат меварзанд.         Инчунин, Вазорати корҳои хориҷӣ иштироки намояндагони Сафорати ИМА, Созмони амнияту Ҳамкории Аврупо, Созмони байналмилалии муҳоҷират, Созмони байналмилалии меҳнат, Шӯъбаи Тоҷикистонии Ассосиатсияи ҳуқуқшиносони амрикоӣ, Идораи СММ оид ба мубориза бо ҷинояткорӣ ва нашъамандӣ, Созмони ғайриҳукуматии «Модар» ва Лигаи занҳои Ҷумҳурии Тоҷикистонро дар ҷаласа таъмин менамояд.