ВАЙРОНКУНАНДАГОНИ ҚОНУН ИҶОЗАТИ РАСМИИ МАҚОМОТИ МАҲАЛЛИРО ДОРАНД

       Душанбе, 25 ноябр. (АМИТ «Ховар», Мавзуна Бойева). -Нақшаи генералии шаҳри Хоруғ дар солҳои 1970 — 1980 таҳия шудааст. Барои тасҳеҳи нақшаи генералӣ фонди тоҷикистонии Оғохони IV дар якҷоягӣ бо Инситути лоиҳакашии «Гипрострой» корҳоро оғоз намуданд.       Муайян карда шуд, ки дар кӯчаи марказии шаҳр ҳангоми сохтани иншоот ба як қатор қонунвайронкунӣ роҳ додаанд. Аз ҷумла бинои Амонатбонк, сохтмони мағозаи 2-ошёна, нуқтаи гуфтугӯии «Вавилон» ва азнавсозии хонаҳои шаҳрвандон, ки иҷозати расмии мақомоти маҳаллиро доранд. Дар ҳолати тасҳеҳи нақшаи генералӣ, бояд иншоот ба он мувофиқ гарданд, ё аз байн бардошта шаванд.       Инчунин, маълум гардид, ки айни ҳол азнавсозӣ ва таъмири варзишгоҳ дар шаҳри Хоруғ қатъ карда шудааст. Сабаб ин аст, ки то ҳол масъалаи аз байн бурдани иншооти ошхонаи хусусӣ дар самти шарқию ғарбии шаҳр ҳалли худро наёфтааст.       Дар сохтмони Раёсати андози вилоят дар шаҳри Хоруғ низ хунукназарӣ ба мушоҳида мерасад. Сохтмони таҳкурсии иншооти мазкур дар асоси лоиҳа тасмагӣ пешбинӣ шудааст, вале дар асл бо истифодаи сангҳо идома дорад.