ҚИССАҲОИ УМРИ КӮТОҲИ ШИРИНШОҲ ДАРСИ ИБРАТАНД

            Хоруғ, 15 декабр. (АМИТ «Ховар», Л. Додоев).- Имрӯз бахшида ба зодрӯзи яке аз абармардони таърихи халқи тоҷик, Қаҳрамони миллат Шириншоҳ Шоҳтемур дар мактаби рақами 12-и ноҳияи Шуғнон, ки номи ӯро дорад, таҳти унвони «Сарсупурдаи миллат» конфронси илмӣ-фарҳангӣ доир гардид. Конфронс аз маросими гулчанбармонӣ дар пояи нимпайкараи Шириншоҳ Шоҳтемур оғоз ёфт. Сипас, толибилмони мактаб барномаи омодакардаашонро пешкаши ҳозирин намуданд. Зикр гардид, ки гарчанде Шириншоҳ Шоҳтемур бо тӯҳмат парронда шуда бошад ҳам, номи некаш пас аз соли вафоти ӯ вирди забонҳо гардид. Дар чорабинии мактабиён набераи Шириншоҳ Шоҳтемур Шакархотун Шоҳтемурова иштирок ва суханронӣ кард. Ӯ қайд намуд, ки қиссаҳои умри кӯтоҳ, вале пурфасонаи Шириншоҳу ҳамаслаконаш барои ҳар фарди тоҷик дарси ибратанд.