ҲИФЗИ ОБЪЕКТҲОИ МОЛИКИЯТИ САНОАТӢ ДАР ҶТ МУҲОКИМА ГАРДИД

          Душанбе, 12 декабр. (АМИТ «Ховар», Покиза Маҳмадбекова). — Дар Вазорати рушди иқтисод ва савдои ҷумҳурӣ дар мавзӯи «Ҳифзи объектҳои моликияти саноатӣ» семинари машваратӣ баргузор гардид. Дар семинар масъалаҳои ҳолати қонунгузорӣ дар соҳаи моликияти зеҳнӣ дар кишвар, таъмини ҳифзи ҳуқуқҳои моликияти зеҳнӣ дар бозорҳои истеҳсоливу истеъмолӣ ва масъалаи сатҳи андешидани чорабиниҳо ҷиҳати пешгирӣ намудани қонунвайронкунӣ дар соҳаи моликияти зеҳнӣ аз ҷониби вазорату идораҳои ҷумҳурӣ мавриди баррасӣ қарор гирифтанд.  Гуфта шуд, ки вазорату идораҳои ҷумҳурӣ дар солҳои оянда бояд чораҳои дахлдор андешенд, то Ҷумҳурии Тоҷикистон заминаи ҳуқуқиашро дар бахши моликияти зеҳнӣ боз ҳам такмил диҳад, қонунвайронкуниро сари вақт дар ин бахш пешгирӣ намояд, ҳифзи қонунҳои шахсонӣ воқеиву ҳуқуқӣ ва давлатиро таъмин карда тавонад. Дар семинари мазкур намояндагон аз Вазорати корҳои дохилӣ, Агентии стандартизатсия, метрология, сертификатсия ва нозироти савдои назди Ҳукумати ҷумҳурӣ, Палатаи савдою саноат, Вазорати рушди иқтисод ва савдо, Вазорати молия ва дигар вазорату идораҳои дахлдор иштирок намуда, фикру ақидаҳои хешро оид ба ин масъала пешниҳод намуданд.