АҲОЛИИ ПОЙТАХТ ИДИ СОЛИ НАВРО ОРОМУ ОСУДА МЕГУЗАРОНАД

          Душанбе,  30  декабр. (АМИТ «Ховар»,  Людмила Дубинина). – Муовини  сардори Раёсати  корҳои  дохилии  шаҳри  Душанбе Неъматулло  Билолов   зимни  сӯҳбат  бо  мухбири  АМИТ «Ховар»  гуфт, ки  иди  Соли  нав  имсол  дар  пойтахти  ҷумҳурӣ  орому  осуда  ва  бе шӯру  ғавғои  зиёдатӣ  таҷлил   карда  мешавад.  Кормандони  милиса  барои  манъи  истифодаи   мушакҳои  тарканда  дар  пойтахт  тадбирҳои  самарабахш  андешиданд.  Дар  натиҷаи  тадбирҳои  андешидашуда чунин   мушакҳои тарканда   ба  қаламрави  ҷумҳурӣ  хеле  кам  ворид  мегардад.          Ба  қавли  ӯ,  кормандони  милиса  то  имрӯз  аз  бозорҳо ва   муассисаҳои  савдо  қариб 4  миллион  дона  мушакҳои  таркандаро  мусодира  карданд. Дар  ин  бобат  дар  ҳамаи  ноҳияҳои  пойтахт комиссияҳои  махсус  ташкил  карда  шуданд. Аъзои  комиссия   дар  байни  аҳолӣ  корҳои  тарғиботиро  пурзӯр  намуданд.           Н.Билолов   афзуд,  онҳое, ки  бар  хилофи  қонун  рафтор  карда,  мушакҳои таркандаро   ба  ҳудуди  мамлакат  ворид  месозанд, ҷазо  дода  мешаванд. Кормандони  милиса   тафтишҳоро  барои  ошкор  намудани  мушакҳои  тарканда  тамоми  рӯзҳои иди Соли  нав  давом  хоҳанд  дод. Фурӯшандагони  мушакҳои  тарканда  ба  маблағи  то  200  маоши  камтарин   ҷарима  андохта  мешаванд. Таъкид  карда  шуд, ки  барои  нигоҳ  доштани  миқдори  зиёди  мушакҳои  тарканда гунаҳкорон то  500  маоши  камтарин  ҷарима  супурда  ё  ба  мӯҳлати  2  сол  аз  озодӣ  маҳрум  карда  мешаванд.