АНҶУМАНИ ЯКУМИ ФИТОТЕРАПЕВТҲО ВА ФИТОФАРМАКОЛОГҲОИ ҶТ

Душанбе, 5 декабр. (АМИТ «Ховар», Ибодат Давлатова). — Моҳи  декабри соли ҷорӣ  Маркази ҷумҳуриявии тиби халқӣ дар якҷоягӣ бо Институти байналмилалии омўзиши осори Ибни Сино ва фармакология (ИБООИС) гузаронидани Анҷумани якуми фитотерапевтҳо ва фитофармакологҳои Тоҷикистонро ба нақша гирифтаанд, ки бешубҳа, он маъракаи муҳими илмии сатҳи ҷаҳонӣ ба ҳисоб меравад. Тавре ба мухбири АМИТ «Ховар» аз маркази матбуоти Вазорати тандурустии Ҷумҳурии Тоҷикистон хабар доданд,  дар анҷуман иштироки   олимони варзида аз кишварҳои хориҷӣ, аз ҷумла Россия, Амрико, Фаронса, Чин ва ғайра дар назар аст. Дар мақолаҳои илмии анҷуман, ки дар маҷмўаи «Масъалаҳои фитотерапия ва фитофармакология» ҷой гирифтаанд,  масъалаҳои муҳими тиби муосир, ба монанди масъалаҳои умумӣ ва ҷузъии фитотерапия, вазъи ҳозираи тиби халқии тоҷик, ҳамчунин дастовардҳо ва масъалаҳои ҳалталаби фитофармакологияи тоҷик мавриди баррасӣ қарор дода шудаанд. Қариб дар аксари мақолаҳои олимони хориҷӣ ҳамкорон   олимони тоҷик, кормандони Маркази ҷумҳуриявии тиби халқӣ мебошанд, ки ин аз дастовардҳои илмии Марказ дарак медиҳад.