АШЪОРИ РӮДАКӢ ДАР АМРИКО БО ЗАБОНИ АНГЛИСӢ ЧОП ШУД

Душанбе, 12 декабр. (АМИТ «Ховар», Бекназари Абӯбакр). – Дар Амрико нахустин маҷмӯаи ашъори cардафтари адабиёти классикии тоҷику форс Абӯабдуллоҳи Рӯдакӣ дар тарҷумаи англисӣ нашр шуд. Ин маҷмӯа достон, қасида, панду ҳикмат ва рубоиёти шоирро бо забонҳои форсӣ ва англисӣ дар бар мегирад. Ин нахустин баргардони осори Рӯдакӣ ба забони англисӣ набуда, нахустин баргузидаи тарҷумаи осори Рӯдакист, ки дар 135 саҳифа ба шакли китоб дар Амрико ба нашр расидааст.  Дар ин китоб, ки «Падари сурудҳо» ном гирифтааст ва аз ҷониби нашриёти «Purdue University Press» ба табъ расидааст, беҳтарин намунаҳои ашъори Рӯдакӣ гирд оварда шудаанд, тарҷумаи ин ашъор ба қалами профессори Донишгоҳи «Бостон», тарҷумон ва шоир Сосони Таботабоӣ тааллуқ дорад.