АЗ ДОХИЛИ ЧАРХИ ЭҲТИЁТИИ МОШИН ГЕРОИН ЁФТАНД

Душанбе, 23 декабр. (АМИТ «Ховар», Мавҷуда Давлатзода).- Кормандони шӯъбаи мубориза бар зидди гардиши ғайриқонунии маводи нашъаовари Шӯъбаи корҳои дохилии ноҳияи Фархор дар дидбонгоҳи ҷамоати Ғалабаи ноҳияи мазкур ронандаи мошини тамғаи «Хайфей» (рақами давлатиаш ВО 0692 РТ 01) Зиёратшо Абдурасулови 45-соларо боздошт намуданд. Мавсуф истиқоматкунандаи кӯчаи Фирдавсии шаҳри Душанбе буда, пеш бо моддаи 200, қисми 3-и Кодекси ҷиноии Ҷумҳурии Тоҷикистон доғи судӣ дошт.  Аз маркази матбуоти Вазорати корҳои дохилии Ҷумҳурии Тоҷикистон ба мухбири АМИТ «Ховар» хабар доданд, ки ҳангоми азназаргузаронии мошин аз дохили чархи эҳтиётӣ 2 килограмму 860 грамм героин ёфт ва мусодира гардид.  Оид ба ин ҳодиса парвандаи ҷиноӣ боз гардида, тафтиш идома дорад.