БАРНОМА ДАР АМАЛ ТАТБИҚ КАРДА МЕШАВАД

         Душанбе,  12  декабр. (АМИТ «Ховар»,  Бекназари  Абӯбакр). –  Фонди  миллии  иҷтимоии  Тоҷикистон  ба  амалӣ  сохтани  барномаи  сеюми  коҳиши  сатҳи  камбизоатӣ  шурӯъ  менамояд.  Барномаи  мазкур  ба  силсилаи   барномаҳои  давлатии  сармоягузори  барои  солҳои  2008 – 2010  ворид  карда шудааст.  Барномаро  Фонди  миллии иҷтимоии  Ҷумҳурии  Тоҷикистон  бо  кӯмаки  Бонки рушди Олмон  амалӣ  месозад. Барнома  дар  14  ноҳияи  қисми  ғарбии  вилояти  Хатлон  амалӣ  карда  мешавад. Барои  иҷрои  он  умуман   6,5   миллион  евро   ҷудо  карда  шудааст.  Дар  ин  маблағ  саҳми  Олмон 5,5  миллион  евро,  саҳми  Тоҷикистон  бештар аз  1  миллион  евро  ва  саҳми ҷамоатҳои  маҳаллӣ  300 ҳазор  евро  мебошад. Барнома,  тибқи  нақша  дар  давоми  36  моҳ  иҷро  карда  мешавад.