БАРНОМАИ БЕҲТАР СОХТАНИ ВАЗЪИЯТИ СОҲАИ МАОРИФ ИҶРО ШУД

       Душанбе, 31 декабр. (АМИТ «Ховар», Людмила Дубинина).- Аз  вазорати маорифи ҷумҳурӣ ба АМИТ «Ховар» хабар доданд, ки барномаи беҳтар сохтани шароит ва сифати таҳсил дар шаҳру ноҳияҳои озмоишии мамлакат иҷро карда шуд. Иҷрои барнома соли 2003 баъди имзои созишномаи Ҳукумати Тоҷикистон ва Бонки ҷаҳонӣ шурӯъ гардида буд. Котиби матбуоти маркази  идораи барнома Парвиз Саидов зимни сӯҳбат бо мухбири АМИТ «Ховар» дар бораи натиҷаҳои иҷрои барнома сухан ронд.         Вай зикр намуд, ки чанд рӯз пеш дар шаҳрҳои Кӯлоб, Ваҳдат, Роғун ва ноҳияҳои Восеъ, Нуробод, Файзобод ва Шоҳмансур бо иштироки директорони мактабҳо, раисони шӯроҳои волидон ва омӯзгорон, намояндагони мақомоти ҳокимияти маҳаллӣ, мудирони шӯъбаҳои маориф ва ғайра натиҷаҳои иҷрои барнома ҷамъбаст карда шуданд.       Зикр шуд, ки дар ин муддат дар шаҳру ноҳияҳои озмоишӣ 418 шӯрои волидон ва омӯзгорон ташкил карда шуд. Дар ин ноҳияҳо мактабҳои нав сохта ва мактабҳои кӯҳна тармим карда шуданд. Дар доираи барнома бештар аз 600 ҳазор нусха китоби дарсӣ чоп карда, ба минтақаҳои гуногуни ҷумҳурӣ фиристода шуд. Мувофиқи барнома, дар ин ноҳияҳо принсипи маблағгузорӣ ба ҳар талаба истифода карда мешавад. Омӯзгорони мактабҳо дар давоми ду соли охир дар курсҳои кӯтоҳмуддат маҳорати худро такмил доданд. Дар доираи барнома дар шаҳри Душанбе ду мактаб ва дар ноҳияи Восеъ як мактаби нав сохта мешавад.