БАРОИ ДОНИШҶӮЁНИ ДОНИШГОҲИ ТИББӢ КИТОБИ ДАРСӢ БА НАШР РАСИД

Душанбе, 10 декабр. (АМИТ «Ховар», Лутфия Эшонқулова).- Ба наздикӣ дар ҶММ «Ғизо» дар ҳаҷми 464 саҳифа китоби наве бо номи «Беҳдошти ғизо» ба табъ расид. Он бо дастгирии Вазорати тандурустии ҶТ чоп гардида, ҳамчун китоби дарсӣ барои донишҷӯёни Донишгоҳи тиббӣ тавсия шудааст. Муаллифони китоб мутахассисони соҳаи тиб Октам Алиев ва Гурез Азимов мебошанд. Дар китоб масъалаҳои назорати санитарии беҳдошти ғизо дар муассисаҳои хӯроки умум, маълумоти асосӣ оид ба таблиғоти ғизогирии дуруст, маҳсулоти гуногуни озуқавӣ, ба монанди таркибияти аминатсидӣ, витаминӣ, минералӣ ва атсиди чарбии беҳади онҳо, моддаҳои минералӣ барои одамони синну солашон гуногун ва маълумот дар бораи ғизои парҳезӣ ва муолиҷавию пешгирикунанда батафсил баён карда шудаанд. Ҳамчунин, китоби мазкурро мутахассисони Хадамоти санитарию эпидемиологӣ, токсокологоҳо, табибони касалиҳои сироятӣ, диетологҳо, технологҳо, табибони санитарие, ки дар соҳаи хӯрок кор мекунанд ва шахсоне, ки ба истеҳсол, интиқол ва захиракунии маҳсулоти озуқавӣ машғуланд, метавонанд истифода баранд. Китоби мазкур аввалин маротиба бо чунин ҳаҷм ва бо забони тоҷикӣ навишта шудааст.