БАРОИ ТАҚВИЯТИ МУБОРИЗА БА МУҚОБИЛИ РИШВАХӮРӢ ЧӢ БОЯД КАРД ?

       Душанбе,  9   декабр.  (АМИТ «Ховар»,  Людмила  Дубинина).- 9  декабр  дар  саросари  ҷаҳон  Рӯзи  байналмилалии  мубориза  ба  муқобили  ришвахӯрӣ  таҷлил  карда  мешавад. Дар ин  бора  Созмони  Милали  Муттаҳид  9  декабри соли  2003  қарор  қабул   карда  буд. Тоҷикистон  ҳам ба  қарору  санадҳои  СММ  дар  бораи  мубориза  ба  муқобили  ришвахӯрӣ  ҳамроҳ  гардида,   барои  тақвияти  ин  мубориза  тадбирҳои  самарабахш  меандешад. Мухбири  АМИТ «Ховар»  дар  ин  мавзӯъ  бо  сардори  Раёсати таҳияи  нақшаҳои  миллии  стратегӣ ва   барномаҳои  иҷтимоию  иқтисодии  Маркази   тадқиқоти  стратегии   назди  Президенти  ҷумҳурӣ Абдулвоҳид  Шамолов  ҳамсӯҳбат  шуд. А.Шамолов  зикр  намуд, ки  аз рӯи  маълумоти  Бонки  ҷаҳонӣ  даромади  солона  аз  ришвахӯрӣ  дар  саросари  ҷаҳон  бештар аз  600 миллиард  доллари  ИМА – ро  ташкил  медиҳад. Давлатҳои  ҷаҳон  хавфи  бузурги   ин  зуҳуроти  номатлубро  барои  ҷомеа  ба  хубӣ  дарк  намуда, ба  муқобили  он  ҳамаҷониба  мубориза  мебаранд.           Бо ин  мақсад  дар  мамлакати мо «Дар  бораи  мубориза ба  муқобили  ришвахӯрӣ», «Дар  бораи  хадамоти  давлатӣ», «Дар  бораи   назорати  давлатии  молиявӣ»  қонунҳо  қабул  намуда,  Агентии махсуси  мубориза  ба  муқобили  ришвахӯрӣ  ташкил  карда шудааст. Вале  ҳуҷҷати  асосӣ  дар  ин  соҳа  Барномаи  миллии  стратегии  мубориза  ба  муқобили  ришвахӯрӣ  мебошад, ки  тадбирҳои   давраи  солҳои  2008 – 2012 – ро  дар  бар  мегирад.  Илова  бар  ин  соли  2006  ислоҳоти   фаъолияти  мақомоти  идораи  давлатӣ  гузаронида шуд. Ҳамаи  ин  дар  бораи  азми  қавии  роҳбарияти  сиёсии  мамлакат   дар  бобати   пурра  барҳам додани  ин  зуҳуроти  номатлуби  ҷомеа   шаҳодат  медиҳад.             А.Шамолов  зикр  намуд, ки  танҳо  бо  қувваи  давлат  ва  сохторҳои  қудратии он  дар  мубориза ба  муқобили  ришвахӯрӣ  натиҷаи  дилхоҳ  ба  даст  овардан  душвор  аст. Ба  ин мубориза  бояд  тамоми  қишрҳои  ҷомеа, тоҷирону  соҳибкорон  ва  созмонҳои  байналхалқӣ  ҷалб  карда  шаванд. Қайд  карда шуд, ки  барои  иҷрои  қонунҳо   ва  барномаи  стратегии  мубориза  ба  муқобили  ришвахӯрӣ  аз  ҳисоби  маблағҳои  ҷумҳуриявӣ ва  маҳаллӣ,  инчунин  созмонҳои  байналхалқӣ  маблағ  ҷудо  карда  мешавад. Дар  шароити  ҳозира  фаъолияти   аҳли  ҷомеаро  дар тақвияти  мубориза  ба  муқобили  ришвахӯрӣ  бештар  сохта,   сабабҳо  ва  шароитеро   барҳам  додан  зарур аст, ки  ба  равнақу  ривоҷи  ришвахӯрӣ мусоидат  мекунад, гуфт  дар  хотима  Абдулвоҳид  Шамолов.