БАРРАСИИ МАСЪАЛАҲОИ КОРУ ЗИНДАГИИ КОРГАРОНИ МУҲОҶИРИ ТОҶИК ДАР РУСИЯ

       Душанбе,  16  декабр.(АМИТ «Ховар», Мавҷуда  Давлатзода). –  Имрӯз  дар  шаҳри  Душанбе  бахшида ба  масъалаҳои  ба  низом  даровардани ҷараёни  муҳоҷирати  меҳнатӣ  дар  Тоҷикистон  ва  проблемаҳои  марбут ба коргарони  муҳоҷири  тоҷик  дар  Федератсияи  Русия  семинар  баргузор  гардид. Дар  он  зикр  шуд, ки айни  ҳол аз  рӯи  маълумоти  ғайрирасмӣ  дар  Русия  ва  мамлакатҳои  дигари  ИДМ  зиёда  аз  600  ҳазор  коргари  муҳоҷири тоҷик  кор  мекунад. Қариб  нисфи  онҳо  дар  ин  мамлакатҳо  ғайриқонунӣ  кору  зиндагӣ  мекунанд.  Рӯзҳои  охир   мақомоти  дахлдори  Русия  нисбати  коргарони  муҳоҷири  хориҷӣ  ва   хусусан  тоҷикон тадбирҳои   қатъӣ  меандешанд.  Аз  ҷумла,  вақтҳои  охир   шумораи  коргарони   муҳоҷири  тоҷик,  ки  аз Русия  ронда шудаанд,  чандин  баробар  афзудааст. Аз  рӯи  маълумоти  Хадамоти  амнияти  Русия,  ҳар  сол  қариб  150  ҳазор  коргари  муҳоҷир  аз  мамлакат  ронда  мешавад. Тоҷикистон   дар  ин  масъала  баъди Ветнам,  Чин   ва  Молдавия  ҷои  чорумро  ишғол  мекунад. Мухбири  АМИТ «Ховар»  хабар  медиҳад, ки   дар  семинар  намояндагони  Ҳукумати  ҷумҳурӣ,  раёсати  муҳоҷирати ВКД, вазорати тандурустӣ ва ташкилоту  идораҳои  дигар  ширкат  варзиданд.