БОЗДИДИ ЭМОМАЛИ РАҲМОН АЗ ТУРБОАТОМ

                 Президенти Ҷумҳурии Тоҷикистон Эмомалӣ Раҳмон ба шаҳри Харкови Украина сафар карда, аз корхонаи азими Турбоатом, ки аз бузургтарин корхонаҳои саноатӣ оид ба бунёди турбина, агрегат ва дигар таҷҳизоти гаронарзиши нерӯгоҳҳои обӣ, атомӣ, ҳароратӣ ва ғайра буда, бо Тоҷикистон ҳамкории пурсамари дерина дорад, дидан кард.                 Чунонки дирӯз дар нишасти матбуотии сарони ду давлат — Эмомалӣ Раҳмон ва Виктор Ющенко таъкид гардид, беш аз 85 дар сади тамоми таҷҳизоти гидротехникии нерӯгоҳҳои обии Тоҷикистон сохти Турбоатом ва дигар корхонаҳои саноатии Украина мебошад.                  Ду агрегати нерӯгоҳи обии Роғун ҳам ҳанӯз солҳои 80-уми асри гузашта аз корхонаи Турбоатом ба Тоҷикистон фиристода шуда буд.                 Президенти Ҷумҳурии Тоҷикистон Эмомалӣ Раҳмон бо иқтидорҳои истеҳсолии корхонаи Турбоатом аз наздик шинос шуда, ба таҳкиму густариш додани ҳамкорӣ бо ин корхона дар самти таҷдиди нерӯгоҳҳои амалкунанда ва таъмини нерӯгоҳҳои нав бо таҷҳизоти гидротехникӣ изҳори ҳавасмандӣ намуд.                Маҳз ҳамин гуна имкону захираҳои фаровон аст, ки дирӯз Виктор Ющенко гидроэнергетикаро самти афзалиятноки робитаҳои иқтисодии ду кишвар маънидод кард ва изҳор намуд, ки «Украина азм дорад ҳамкории худро бо Тоҷикистон ба сатҳи стратегӣ барорад».                 Ба андешаи ӯ Тоҷикистону Украина имкон доранд дар ҳамкории зич ҳаҷми мубодилоти тиҷоратии байни худ ва бо кишварҳои Осиёи Марказиро ба маротиб боло баранд.               Дар ин бора ба АМИТ «Ховар» аз Котиби матбуоти Президенти Ҷумҳурии Тоҷикистон Абдуфаттоҳ Шарифзода телефонӣ аз шаҳри Киеви Украина иттилоъ дод.