БУҶАИ ШАҲРИ КӮЛОБ БАРОИ СОЛИ 2009 ТАСДИҚ ШУД

          Кӯлоб, 24 декабр. (АМИТ «Ховар», Сулаймон Холов).- Тибқи иттилои сардори Раёсати молияи мақомоти иҷроияи маҳаллии ҳокимияти давлатии шаҳри Кӯлоб Бахтиёр Назаров, вакилони мардумӣ буҷаи шаҳри Кӯлобро барои соли 2009 тасдиқ намуданд, ки он нисбати соли гузашта як маротиба зиёд аст.         Бо назардошти талаботи рӯзмарра, буҷаи имсолаи шаҳр дар ҳаҷми 27 миллиону 441 ҳазору 32 сомонӣ муқаррар шуд. Бахтиёр Назаров гуфт, ки қисмати зиёди маблағи буҷа ба соҳаи маориф ва тандурустӣ равона карда шудааст. Аз маблағи умумӣ 15 миллиону 340 ҳазору 244 сомонӣ барои соҳаи маориф, 5 миллиону 650 ҳазор сомонӣ — соҳаи тиб, 423 ҳазору 785 сомонӣ — фарҳанг, 1 миллиону 250 ҳазор сомонӣ — сохтмон ва 450 ҳазор сомонӣ барои соҳаи нақлиёт пешбинӣ шудааст. Қисмати боқимондаи маблағ барои кӯмакҳои иҷтимоӣ ва фонди захиравии шаҳрдорӣ сарф хоҳад шуд.