ЧАРО ДЕГХОНАИ «ҒАРБӢ» БА КОР ДАРОВАРДА НАШУД?

        Душанбе, 23 декабр. (АМИТ «Ховар», Марзия Саидова).- Тибқи иттилои директори Маркази истеҳсоли барқу гармидиҳии шаҳри Душанбе (МБГ) Умаралӣ Ниёзов, истеҳсоли энергияи гармӣ дар пойтахт дар мавсими зимистон ба миқдори 229,5 Гкал/соат ба нақша гирифта шудааст. Ин миқдори гармӣ дар МБГ шаҳри Душанбе 164,5 Гкал/соат, дар дегхонаи «Ғарбӣ» 50 Гкал/соат  ва дар дегхонаи «Шарқӣ» 15 Гкал/соат бояд истеҳсол мешуд. Феълан таъминоти сӯзишворӣ дар МБГ шаҳри Душанбе барои истеҳсоли энергияи гармӣ ба миқдори 110 Гкал/соат рост меояд, ки ин миқдор 52,1фоизи нақшаро ташкил медиҳад.         У.Ниёзов афзуд, ки дегхонаи «Ғарбӣ» бо сабаби таъмин нашудани сӯзишворӣ дар мавсими равон ба кор дароварда нашуд. Муштариёни  энергияи гармии аз ин  дегхона ба нақша гирифташудаи ноҳияи Сино қисман ба хатҳои интиқоли гармии «Рости-2»-и МБГ бо иқтидори 32 Г/кал пайваст шудаанд.        Истифодабарандагони энергияи гармии ноҳияи Фирдавсӣ, ки ба хати  интиқоли гармии «Рости-1» пайваст мебошанд, аз сабаби нарасидани сӯзишворӣ бо энергияи гармӣ таъмин нестанд.        Миқдори зарурии сӯзишвории гази табиӣ барои ба кор даровардани хати интиқоли энергияи гармии «Рости-1» 12 ҳазор м3/соат-ро дар бар мегирад. Ин миқдори сӯзишворӣ бо истеҳсоли 59 Гкал/соат энергияи гармии иловагии барои ноҳияи Фирдавсӣ банақшагирифташуда баробар аст, ки Айни замон таъмин нест.        Бояд зикр кард, ки Маркази истеҳсоли барқу гармидиҳии пойтахт субъекти зертобеи ШСХК «Барқи тоҷик» буда, масъалаи таъминоти сӯзишворӣ барои фаъолияти таъинотии он низ ба зиммаи ҳамин ташкилот  вогузор аст.