ДАР 11 МОҲ СЕ СӮХТОРИ КАЛОН ДАР НОҲИЯИ ФИРДАВСӢ

             Душанбе, 16 декабр. (АМИТ «Ховар», Лаззат Диловарзод).- Дар 11 моҳи соли ҷорӣ дар ноҳияи Фирдавсӣ 3 ҳодисаи сӯхтор ба қайд гирифта шудааст, ки аз он ба соҳибкорон ва тоҷирон хисороти зиёди пулию молӣ расидааст. Бино ба гуфтаи прокурори ноҳия Раҷабалӣ Юлдошев, дар ду ҳолат нисбати гунаҳгорон парвандаи ҷиноятӣ кушода шудааст. Қасдан аз ҷониби Алишер Собирҷонов оташ задани мағозаи «Престиж» дар бозори «Корвон» тасдиқи худро ёфт ва нисбати ӯ парвандаи ҷиноятӣ кушода шуда, ба суд ирсол гардид. Бояд зикр намуд, ки дар ин муддат барои вайрон кардани қоидаҳои бехатарии зидди сӯхтор 38 нафар ба ҷавобгарӣ кашида шудааст. Муайян карда шуд, ки бештари сӯхторҳои баамаломада аз беаҳамиятӣ ва бесалоҳиятии худи соҳибкорон рух додаанд.