ДАР БОТЛОҚЗАМИНҲО ШОЛӢ КИШТ КАРДА, ҲОСИЛИ ХУБ МЕГИРАНД

            Душанбе, 10 декабр. (АМИТ «Ховар», Лаззат Диловарзод).- Шолӣ яке аз зироатҳои хеле муҳими дунё ба ҳисоб меравад. Дар ҷаҳон аз ҷиҳати масоҳати кишт ва истеҳсоли умумии ҳосили ғалла, он баъд аз гандум ҷойи дуюмро ишғол мекунад.  Дар мамлакатҳои Осиёи Марказӣ, аз ҷумла дар Тоҷикистон истеҳсоли шолӣ яке аз соҳаҳои даромаднок маҳсуб меёбад. Барои истеҳсоли шолӣ заминҳоеро истифода бурдан мумкин аст, ки барои кишти пахта номуносибанд. Барои кишти шолӣ заминҳои соҳили дарёҳо, шӯрзаминҳо ва ботлоқзаминҳоро истифода мебаранд ва ҳосили дилхоҳ мегиранд. Дар чунин заминҳо парвариш кардани шолӣ имкон медиҳад, ки таркибу ҳолати замин беҳтар гардад,- иброз дошт номзади илмҳои кишоварзӣ П.Х. Холиқов ба мухбири АМИТ «Ховар».