ДАР ИМА 1150-УМИН СОЛГАРДИ ЗОДРӮЗИ РӮДАКИРО ҶАШН ГИРИФТАНД

Душанбе, 9 декабр. (АМИТ «Ховар», Бекназари Абӯбакр). – Охири ҳафтаи гузашта бо ташаббуси намояндагии Тоҷикистон дар СММ дар чаҳорчӯбаи таҷлили 1150-умин солгарди зодрӯзи одамушшуаро, сардафтари адабиёти классикии тоҷику форс Абӯабдуллоҳи Рӯдакӣ дар яке аз машҳуртарин марказҳои илмиву омӯзишии Амрико – Донишгоҳи «Колумбия»-и Ню-Йорк бахшида ба ҳаёту эҷодиёти ин нобиға мизи мудаввар баргузор гардид. Дар мизи мудаввар олимону донишмандони Амрико ва аҳли илму адаби ин кишвар ширкат варзиданд. Донишмадон зимни суханрониҳо ҷанбаи одамдӯстӣ, даъват ба таҳаммулпазирӣ ва сулҳ, панду насиҳатҳои оқилонаи Рӯдакии бузургворро таъкид намуданд. Тибқи ишора Рӯдакӣ дар замоне ба дунё омад ва шеърҳояшро эҷод кард, ки он миёни эроншиносон ҳамчун замони эҳёи фарҳанг, забон, давлат ва тамаддуни форсӣ маъруф аст.