ДАР НАЗДИ МАМЛАКАТҲОИ АЪЗОИ ҶОМЕАИ ИҚТИСОДИИ ЕВРАЗИЯ ВАЗИФАҲОИ ДУШВОР

                   Бишкек, 13 декабр.(АМИТ «Ховар» — Кабар ). — Сарвазири Ҷумҳурии Қирғизистон Игор Чудинов дирӯз дар маҷлиси Шӯрои байнидавлатии мамлакатҳои аъзои Ҷомеаи иқтисодии Евразия изҳор намуд, ки давлатҳои аъзои ҷомеа вазъияти душвори вобаста ба бӯҳрони шадиди молиявӣ ва озуқаро танҳо дар натиҷаи андешидани тадбирҳои муштарак ва якҷоя беҳтар карда метавонанд. Вай чунин мешуморад, ки ҷараёни таҳия ва қабули барномаи таъмини амнияти озуқавории давлатҳои аъзои ҷомеаро тезонидан зарур аст.                   И.Чудинов таъкид кард, ки бо маводи озуқа ва маҳсулоти дигари ҳаётан зарур таъмин кардани аҳолӣ вазифаи асосӣ ва муҳимтарини ҳар давлат мебошад. Ин вазифаро бе ҳалли проблемаи бартараф сохтани фарқияти сиёсати транзитӣ ва ташаккули иттифоқи нақлиётии давлатҳои аъзои ҷомеа пурра иҷро намудан имконнопазир аст.  Роҳҳои нақлиётӣ ба ин маъно рагҳои хунгарди иқтисодиёт мебошанд. Бе рушди ҳамаҷониба ва таъмини фаъолияти роҳу нақлиёт дар бораи ҳамкории доманадор дар ягон соҳаи иқтисодиёт ҳоҷати сухан рондан ҳам нест, гуфт вай. Сарвазири Қирғизистон изҳор намуд, ки имрӯз ташкили гурӯҳҳои корӣ аз ҷумлаи коршиносони варзидаи мамлакатҳои аъзои ҷомеа бо мақсади муайян намудани шаклу усулҳои иштироки мамлакатҳои аз доираи ҳамгироӣ берунмонда, ташкили иттифоқи навтаъсиси гумрукҳо ва ғайра ба мақсад мувофиқ мебошад. И.Чудинов дар фарҷоми суханрониаш зикр кард, ки дар назди давлатҳои аъзои ҷомеа дар ин масъала вазифаҳои душвор гузошта мешаванд.                 Ҷомеаи иқтисодии Евразия дар ин рӯзҳои душвор санҷишҳои навро аз сар мегузаронад. Мо бояд ба аҳолии мамлакатҳоямон на танҳо дар бораи таҳияю қабули ҳуҷҷатҳо хабар диҳем, балки бояд дар амал исбот кунем, ки фаъолияти мо ба одамон манфиати воқеӣ расонда метавонад, гуфт вай.                                                                                                                                              Тарҷумон — Қудратов А.