ДАР НОҲИЯИ ФИРДАВСИИ ПОЙТАХТ АНБОРИ ТОҶИРИ ЭРОНӢ СӮХТ

           Душанбе, 2 декабр. (АМИТ «Ховар», Мавҷуда Давлатзода).- Кормандони озмоишгоҳи махсуси илмию тадқиқотӣ ва шӯъбачаи тадқиқи Сарраёсати Хадамоти давлатии оташнишонии ВКД-и Ҷумҳурии Тоҷикистон барои маълум намудани сабаби сӯхтори шаби 29-уми ноябр, ки дар кӯчаи Пирогова 1-и ноҳияи Фирдавсии пойтахт, дар анбори нигоҳдории қолину гилем ва дигар молу ашёи синтетикӣ рух дод, чораҳои зарурӣ андешида истодаанд.        Бояд зикр намуд, ки анбори мазкур ба шаҳрванди Ҷумҳурии Исломии Эрон Муҳаммади Хоксор тааллуқ дорад. Амволи ӯ мансуб ба ҶДММ-и илмию истеҳсолии Иттифоқи Тоҷикматлубот буда, ба тоҷир барои истифодабарии иҷора дода шуда буд. Аз маркази матбуоти Сарраёсати Хадамоти давлатии оташнишонии ВКД-и Ҷумҳурии Тоҷикистон ба мухбири АМИТ «Ховар» хабар доданд, ки сӯхтор соати 22-ю 55 дақиқа ба вуҷуд омадааст. Баробари садо додани бонги хатар гурӯҳи навбатдори ВКД бо 5 автомашинаи соҳавӣ ба ҷойи ҳодиса мераванд. Дар натиҷаи амалӣ кардани чораҳои фаврӣ — тактикии оташнишонӣ, ба онҳо муяссар мешавад, ки сӯхторро аз соати 23-ю 55 дақиқа то 00.47 дақиқа хомӯш намоянд.