ДАР НУРОБОДУ РАШТ КОРҲОИ БЕТОНРЕЗӢ ИДОМА ДОРАД

              Душанбе, 17 декабр. (АМИТ «Ховар», Мавзуна Бойева).- Лоиҳаи таҷдиди роҳи Душанбе — сарҳади Ҷумҳурии Қирғизистон, Фазаи II аз 17-уми ноябри соли 2005 тасдиқ гардид. 14-уми феврали соли 2006 оид ба ин лоиҳа миёни Ҳукумати Ҷумҳурии Тоҷикистон ва Бонки Осиёгии Рушд Созишномаи қарзӣ ба имзо расид. Маблағи умумии лоиҳа 39,5 млн. доллари ИМА-ро дар бар мегирад. 29-уми декабри соли 2006 Вазорати нақлиёт ва коммуникатсияи ҶТ бо ширкати машваратии «Финроуд»-и Финландия шартнома ба имзо расонид. 24-уми январи соли 2007 бошад, бо ширкати «Синохайдро»-и Ҷумҳурии Халкии Чин барои корҳои сохтмонӣ шартнома ба имзо расид. Аз замони тадбиқи лоиҳа то имрӯз 1 124 400 м³ корҳои заминканӣ, 556 метр насби қубурҳои обгузар, 1883 метр кандани ҷӯйборҳои обпарто, 406 метр сохтмони девори муҳофиз, 21 км барқароркунии таҳкурсии болопӯши роҳ ва 7,1 км мумфарш намудани қабати поёнии болопӯши роҳ ба анҷом расидааст. Бояд зикр намуд, ки дар купрўкҳои ноҳияҳои Нурободу Рашт корҳои бетонрезӣ ва сохтмони таҳкурсии такягоҳҳо идома дорад.