ДАР РАШТ ДАРАХТҲОИ БОҒҲОРО РЕШАКАН МЕКУНАНД

               Душанбе, 18 декабр. (АМИТ «Ховар», Лаззат Диловарзод).- Солҳои давраи ҷанги шаҳрвандӣ аз фаъолият мондани идораи «Карантин»-и ҷумҳурӣ боис шуд, ки соҳибкорон аз хориҷи кишвар тухмии картошкаро бо зӯрию тариқи қочоқ ворид намоянд.              Дар таркиби картошкаи навъи «Кардинал», ки ҳамон солҳо ворид карда шудааст, деҳқонон тухми ҳашароти зараррасон-гамбускро пайдо карданд, ки аллакай дар заминҳо якҷоя бо картошка «кишт» шуда буд. Аз чунин беназоратӣ намудҳои гуногуни ҳашароти зараррасон ба ҷумҳурӣ оварда шуда, дар боғот низ паҳн гардид.              Бино ба гуфтаи раиси ноҳияи Рашт М.Толибов, қариб ҳамаи боғҳои мевадиҳанда ба касалӣ гирифтор шуда, аз ҳосил мондаанд. Хоҷагиҳои боғпарвар дарахтонро бурида заминро аз боғ тоза мекунанд.             — Олимони Академияи илмҳои кишоварзӣ соли ҷорӣ пӯстлоху решаю танаи дарахтонро барои санҷиши лабораторӣ бо худ бурданд, аммо сабаби касалии дарахтон то имрӯз номаълум аст,- афзуд ӯ.              Ҳоло вақти он расидааст, ки лабараторияҳоро дар худи ноҳияҳои боғпарвар ва ҳеҷ набошад ба тарзи сайёр таъсис бояд дод.