ДАР РУСИЯ МУҲОҶИРОНИ ҒАЙРИҚОНУНИРО ҶУСТУҶӮ МЕКУНАНД

        Маскав,  25  декабр. (АМИТ «Ховар» — РИА  «Новости»). – Раёсати  Хадамоти   федералии  муҳоҷирати  вилояти  Маскав   хабар  дод, ки минбаъд  коргарони  муҳоҷири  ғайриқонунӣ  бо  кӯмаки  чархболҳо  ва  ҳавопаймоҳои  бесарнишин  ҷустуҷӯ карда мешаванд. Амалиёти мазкур дар якчанд ноҳияи вилоят  гузаронида  мешавад. Дар   чархболҳо  ва  ҳавопаймоҳо  дастгоҳҳои  аккосӣ ва  наворгирӣ  насб  карда  хоҳанд  шуд.       Муовини сардори раёсати Хадамоти муҳоҷирати вилояти  Маскав  Андрей  Ткаченко   зикр  кард, ки дар ин  бобат   амалиёти  нахустин   дар  ҳудуди  ноҳияҳои  Ленин, Подолск ва Чехов гузаронида шуд. Ҳавопаймоҳо  ва   чархболҳо  маҳалҳои  истиқоматии  қад – қади   роҳҳои  мошингардро  назорат  мекунанд. Зеро  одатан  коргарони  муҳоҷир  барои   кору  истиқомат  маҳалҳои  дурдаст ва  душворгузарро  интихоб  менамоянд. Ин  иқдом   имкон  медиҳад, ки   масоҳати  калони  ҷангалзор  ва  маҳалҳои  истиқоматӣ  зери  назорат  гирифта  шавад. А.Ткаченко афзуд, ки  раёсату  шӯъбаҳои  вилоят дар  ин  бобат  дастури  дахлдор  гирифтанд. Барои кормандони  милиса  ду автобус  ҷудо  карда  шуд, ки бо  воситаҳои  алоқаи  радифӣ  муҷаҳҳаз  мебошанд. Ба  воситаи  онҳо  дар  бораи  ҳар  мардикор  фавран  маълумоти  зарурӣ  гирифта  мешавад.          Аз  рӯи  маълумоти  мавҷуда,  соли  2008  дар  вилояти  Маскав  қариб  900  ҳазор  мардикори  хориҷӣ  ба  қайд  гирифта  шуд.  Аз ин  ҷумла,  ба  240  ҳазор  нафар  иҷозати  кор  кардан  дода  шудааст. А.Ткаченко дар  фарҷоми  сӯҳбат  зикр  кард, ки   вақтҳои  охир   миқдори  қонуншиканиҳои  дағалона  аз  ҷониби  муҳоҷирон  хеле  кам  шудааст.