ДАР ТОҶИКИСТОН КОРХОНАҲОИ МУШТАРАК ТАЪСИС ДОДА МЕШАВАД

        Душанбе, 9 декабр. (АМИТ «Ховар», Бекназари Абӯбакр). — Дар доираи сафари давлатии Президенти Тоҷикистон Эмомалӣ Раҳмон ба Украина, миёни Вазорати энергетика ва саноати Тоҷикистон ва ҶСК «Турбоатом»-и шаҳри Харков оид ба таъсиси корхонаи муштараки истеҳсоли таҷҳизоти гидротурбинаҳо барои нерӯгоҳҳои хурду миёнаи Тоҷикистон созишнома ба имзо расид. Дар ин бора сомонаи Интернетии atn.kharkov.ua иттилоъ додааст. Тибқи иттилои сарчашма, моҳҳои январ-феврали соли 2009 дар Душанбе ҷонибҳо масоили ҳуқуқиву ташкилии таъсиси корхонаи муштарак оид ба лоиҳакашӣ ва истеҳсоли таҷҳизоти гидротурбина барои нерӯгоҳҳои хурду миёна дар Тоҷикистон ва номгӯи зарурии таҷҳизотро баррасӣ мекунанд. Инчунин, сомонаи Интернетии Президенти Тоҷикистон – president.tj хабар медиҳад, ки дар мулоқоти Президенти Ҷумҳурии Тоҷикистон Эмомалӣ Раҳмон бо роҳбарони корхонаҳои азими «Турбоатом» ва «Электротяжмаш» масоили барқарорсозӣ ва густариши ҳамкориҳои бевосита баррасӣ шуданд.        Аз рӯи натиҷаи гуфтушунидҳо ду санади муҳими ҳамкорӣ дар бораи бунёди ду корхонаи муштараки истеҳсолӣ дар Тоҷикистон ба имзо расид, ки мутобиқи яке аз онҳо дар заминаи корхонаи «Тоҷиктекстилмаш»-и шаҳри Душанбе корхонаи муштараки Тоҷикистону «Турбоатом»-и Харков оид ба истеҳсоли таҷҳизоти гидротехникӣ барои нерӯгоҳҳои хурду миёна кушода мешавад. Тибқи санади дуюм имконоти бунёди корхонаи муштараки истеҳсоли тракторҳои ХТЗ дар Тоҷикистон мавриди омӯзиш қарор мегирад. Эмомалӣ Раҳмон бо фаъолияти корхонаи «Турбоатом» аз наздик ошно гардида, ҷузъиёти шартномаи таъмини нерӯгоҳи «Норак»-ро бо таҷҳизот мавриди баррасӣ қарор додааст. Ҷиҳати сохтани шаш агрегат ба маблағи $12 млн. барои нерӯгоҳи Норак, бо корхона гуфтушунид шуда, то ахири сол имзои шартнома дар ин хусус пешбинӣ гардидааст. Мӯҳлати иҷрои шартнома 3,5 солро ташкил дода, дар як сол корхона ба Тоҷикистон 2 гидротурбина хоҳад фиристод.