ДАР ЯК СОЛ 6 ҲАЗОР ШАҲРВАНД СОҲИБИ МОШИН ШУД

           Душанбе, 17 декабр. (АМИТ «Ховар», Лаззат Диловарзод).- Бино ба иттилои сардори Бозрасии давлатии автомобилии минтақаи Кӯлоби вилояти Хатлон Талбӣ Сафаров, дар минтақаи Кӯлоб дар давоми соли 2008 шумораи ронандаҳои мошинҳои шахсию давлатӣ 6 ҳазор нафар афзудааст. Дар давоми 11 моҳи соли ҷорӣ шумораи нақлиёти шахсию давлатӣ ба 23 ҳазор адад расидааст, ки ин нисбат ба соли 2007 6 ҳазор адад зиёд аст.Зиёд шудани нақлиёт аз як тараф боиси фаъолияти хуби соҳибкорӣ гардида бошад, аз дигар ҷониб боиси садамаҳои зиёд ва ҳалокату маҷрӯҳии садҳо шаҳрвандон гардидааст. Масъалаи дар паси чанбар нишастани ронандаҳо агар таъҷилан дар доираи қонунҳои қабулгардида ҳаллу фасл нагардад, оқибатҳои ногувореро ба миён меорад,- иброз дошт Талбӣ Сафаров.