ДУ НАФАРРО ДАР ЯК ҲУҶРА БА ҚАТЛ РАСОНИДАНД

                  Душанбе, 13 декабр. (АМИТ «Ховар», Анварбек Сиддиқов).- Аз ҳуҷраи 28-и хонаи 7-и кӯчаи Чапаеви шаҳри Чкаловск ҷасади шаҳрвандон Зикрулло Ахмедов (соли таваллудаш 1990) ва Ёсирҷон Қаҳрамонов, ки рӯзи 10-уми декабри соли ҷорӣ беному нишон гум шуда буданд, ёфт гардид.                   Тавре аз маркази матбуоти ВКД-и ҷумҳурӣ ба АМИТ «Ховар» иттилоъ доданд, дар рафти гузаронидани чораҳои фаврӣ-ҷустуҷӯӣ, кормандони ҳамин сохтор муайян карданд, ки 10-уми декабр, соати 14 итиқоматкунандагони ноҳияи Панҷакент Зафари Соҳибназар ва Ҷовид Тошев дар бозори «Дӯстӣ»-и ноҳияи Бобоҷон Ғафуров бо шаҳрвандон Зикрулло Ахмедов ва Ёсирҷон Қаҳрамонов вомехӯранд. Номбаршудагон худро харидори автомашинаҳои онҳо («Опел — Астра» бе рақами давлатӣ ва «Мерседес Бенс», рақами давлатиаш ЕН 3250 02РТ ) вонамуд мекунанд. Баъдан, бо баҳонаи додани пул онҳоро ба ҳуҷраи 28-и хонаи 7-и кӯчаи Чапаеви шаҳри Чкаловск мебаранд. Дар ҳамин хона онҳоро бо корд ба қатл расонида, як телефони мобилиро, ки арзишаш 10 ҳазор рубли русӣ аст, гирифта, ба ҷои номаълум ғайб мезананд.                Дар рафти гузаронидани чораҳои фаврӣ-ҷӯстуҷӯии гурӯҳи махсуси кормандони милисаи ҳамин минтақа, шаҳрвандон Зафари Соҳибназар ва Ҷовид Тошев дастгир карда мешаванд.                Оид ба ин ҳодиса бо моддаҳои 104 ва 249-и Кодекси ҷиноии Ҷумҳурии Тоҷикистон парвандаи ҷиноӣ оғоз карда шуда, тафтишот идома дорад.