«ХЛОПУШКА»-ҲОИ АЛИШЕР ПӮЛОДОВ НАТАРКИДАНД

                Душанбе, 16 декабр. (АМИТ «Ховар», Лаззат Диловарзод).- Дар соли нав тарконидани маводи тарканда, ба истилоҳ «хлопушка» қариб ба анъана табдил ёфтааст. Бино ба иттилои дафтари матбуоти Вазорати корҳои дохилӣ, чунин амал, ки дар соли нави 2009 метавонист боиси зарари шаҳрвандони кишвар гардад, аз тарафи кормандони умури дохилӣ пешгирӣ гардид. Гурӯҳи фаврии умури дохилӣ аз хонаи истиқоматкунандаи шаҳри Конибодом Алишер Пӯлодов 58 адад оташфаввора (салют), 7442 қуттӣ маводи тарканда (хлопушка) дарёфт ва мусодира карданд.  Боиси зикр аст, ки воридоти маводи тарканда аз қабили оташфавора (салют) ва тарканда (хлопушка) ба Ҷумҳурии Тоҷикистон манъ карда шудааст.   То соли нав 15 рӯзи дигар боқист, аммо дар кӯчаҳои пойтахт садои «хлопушка» ба гӯш мерасад.