ИНШООТ ПЕШ АЗ МӮҲЛАТИ ЛОИҲА МАВРИДИ ИСТИФОДА ҚАРОР ГИРИФТ

Душанбе, 12 декабр. (АМИТ «Ховар», Бекназари Абӯбакр). — Лоиҳа аз ҷониби Бунёди Миллии Иҷтимоии Маблағгузории Тоҷикистон дар доираи ҳамкориҳои миёни Ҳукумати Ҷумҳурии Тоҷикистон ва Ҳукумати Ҷумҳурии Федералии Олмон ҷиҳати татбиқи барномаи «Фондҳо барои мусоидати рушди маълумоти асосӣ ва инфраструктураи ҷамоавӣ» иҷро гардид. Бояд тазаккур дод, ки иншоот 2,5 моҳ пеш аз мӯҳлати лоиҳа мавриди истифода қарор гирифт. Сохтмончиён дар бунгоҳ шабакаҳои гармидиҳӣ ва хунуккуниро пешбинӣ намудаанд, ки дар фаслҳои зимистону тобистон ҳарорати мӯътадили ҳаво дар утоқҳои корӣ таъмин мегардад. Ғайр аз ин, бо фарорасии мавсими сармо БМИМТ бунгоҳи тиббиро бо маводи сӯхт (ангишт) таъмин менамояд. Лозим ба ёдоварист, ки деҳаи Янгиобод соли 1972 таъсис ёфта, аз ҷамоати Ғаллаобод дар масофаи 15 км. ва аз маркази ноҳия дар масофаи 18 км. ҷойгир аст. Ин деҳаро «6-ум насос» ҳам ном мебаранд. Деҳа аз 184 хоҷагӣ иборат буда, аҳолии он 1486 нафарро ташкил медиҳад. Азбаски деҳа аз маркази ноҳия дар масофаи дур воқеъ аст, табиист, ки мушкилиҳо ҳастанд. Яке аз ин мушкилиҳо – ба талабот ҷавобгӯ набудани нуқтаи хизматрасонии тиббӣ мебошад, ки ҳайати кормандони он аз ду нафар: духтур ва ҳамшираи тиббӣ иборат аст. Ин нуқтаи хизматрасонӣ, ки соли 2005 таъсис ёфтааст, дар вагон ҷойгир шуда буд ва барои хизматрасонӣ шароити мусоид надошт. Мардуми деҳа танҳо кӯмаки аввалияи худро дар ҳамин бунгоҳ мегирифтанд. Сокинони деҳа дар аксар мавридҳо аз хизмати беморхонаи марказии ноҳия истифода мебурданд, ки на ҳама чунин имкониятҳоро доштанд.