МӮҲЛАТИ ҚОНУНИГАРДОНИИ МОЛУ МУЛК 6 МОҲ ТАМДИД КАРДА ШУД

         Душанбе, 23 декабр. (АМИТ «Ховар», Марзия Саидова).-  Қонунигардонии молу мулк дар Ҷумҳурии Тоҷикистон ба мӯҳлати 6 моҳ тамдид карда шуд. Дар ин хусус 23 –юми декабр палатаи поёнии парлумони мамлакат ба лоиҳаи Қонуни Ҷумҳурии Тоҷикистон «Дар бораи авфи шаҳрвандон ва шахсони ҳуқуқӣ бинобар қонунигардонии молу мулк» тағйирот ворид кард. Зимни шарҳи ин масъала раиси Маҷлиси намояндагон Сайдулло Хайруллоев гуфт, ки тамдид кардани мӯҳлати қонунӣ гардонии молу мулк аз ҷониби Президенти ҷумҳурӣ Эмомалӣ Раҳмон ба парлумон пешниҳод шудааст.        Бояд зикр кард, ки қонуни мазкур ба шаҳрвандон ва  шахсони  ҳуқуқӣ имкон медиҳад, ки молу мулки худро қонунӣ гардонанд. Қонуни мазкур 23- юми майи соли 2007 қабул карда шуда буд ва  амалӣ гардонидани он мебоист то 31- уми декабри  соли 2008 ба анҷом расонида мешуд.        Мақсади асосии қонуни мазкур ба гардиши расмии иқтисодӣ ҷалб намудани молу мулк, муайян намудани моликияти ҳуқуқии шахсони воқеӣ, беҳтар сохтани фазои иқтисодии кишвар ва рушди фаъолияти соҳибкорӣ дар мамлакат мебошад.