МАҲСУЛИ ДАСТИ ТОҶИКОН ДАР ЭРОН БА НАМОИШ ГУЗОШТА МЕШАВАД

        Душанбе, 10 декабр. (АМИТ «Ховар», Марзия Саидова).- 10-уми декабр дар қасри «Фарҳангсаройи миллал»-и Теҳрон ҳафтаи дӯстии Тоҷикистону Эрон оғоз гардид. Ин чорабинии фарҳангӣ бо ибтикори Сафорати Ҷумҳурии Тоҷикистон дар Ҷумҳурии Исломии Эрон ташкил карда шуда, мақсади он тақвият додани робитаҳои фарҳангии ду кишвари форсизабон мебошад.        Ҳайати фарҳангиёни тоҷик, ки ба он ҳунармандони шинохта, мутрибону тарроҳон ва аксбардорон шомиланд, муддати як ҳафта бо ҳунари волою нотакрори худ Тоҷикистонро ба эрониён муаррифӣ менамоянд. Аз ҷумла, ҳунармандони машҳури тоҷик Ҷӯрабек Муродов, Қурбоналӣ Раҳмонов ва дигар гурӯҳҳои ҳунарӣ бо барномаҳои ҷолиби консертӣ дар назди сокинону меҳмонони Теҳрон баромад менамоянд. Инчунин, дар доираи ҳафтаи дӯстӣ намоиши ҳунарҳои мардумии Тоҷикистон ташкил карда шуда, тарроҳи шинохта Мукаррама Қаюмова маҳсули ҳунари дастони худ-мӯдҳои гуногунро ба маърази тамошо мегузорад. Намоиши суратҳо, ки дар он аксҳои суртгири шинохта Заур Дахте ба маърази тамошо гузошта мешавад, бинандаро бо рӯзгори тоҷикистониён ошно месозад. Ҳамчунин, шоирони шинохтаи тоҷик Гулназар Келдӣ ва Ҳақназар Ғоиб аз ашъори худ шеърҳо қироат карда, ба базмгаҳи ҳафтаи дӯстӣ шукӯҳи хосса зам менамоянд.