МАҶАЛЛАИ « ФОРУМ ПЛЮС» АЗ ЧОП БАРОМАД

           Маскав, 2  декабр. АМИТ «Ховар»,   Ҳалима  Хушқадамова). – Дар  Маскав   шумораи  махсуси  маҷаллаи  «Форум  плюс»  аз  чоп  баромад, ки   нашрияи  Бунёди  байнидавлатии  ҳамкории  гуманитарӣ ва  Шӯрои  ҳамкории  гуманитарии  давлатҳои ИДМ  мебошад. Ин  шумораи  маҷалла  ба  воқеаи  муҳимтарини имсолаи   фарҳангии  мамлакатҳои  ИДМ – мулоқоти  сеюми  намояндагони  зиёиёни  илмӣ ва  эҷодкори  мамлакатҳои  ИДМ  бахшида  шудааст. Дар  саҳифаи  аввали он  суханони  Президенти  Тоҷикистон  Эмомалӣ  Раҳмон  иқтибос  шудаанд, ки  гуфта  буд, «маҳз  маърифат,  фарҳанг ва  илм  сифати  зиндагии  ҳар  фардро  ташкил  дода,  ба  манфиатҳои он  бевосита  дахолат  мекунанд».           Дар  мақолаи  «В слове «Душанбе» душа  на  первом  месте»  дар  бораи  маросими  супоридани  ҷоизаҳо  ба  ғолибони  озмуни «Адибони  ҷавони  Иттиҳод»  нақл  карда  мешавад, ки  дар  Душанбе бо  иштироки   Сардори  давлати  Тоҷикистон   баргузор  гардида  буд. Мухбири  АМИТ «Ховар» хабар медиҳад, ки шумораи  махсуси маҷалла  ба  иштирокчиён  ва  меҳмонони  мулоқоти роҳбарони воситаҳои  ахбори оммавии  мамлакатҳои  ИДМ  тӯҳфа  карда шуд, ки  имрӯзҳо  дар  Маскав  давом  дорад.