МАКОТИБЕ, КИ ШАРОИТИ ТАЪЛИМӢ НАДОРАНД, АЗ НАВ СОХТА МЕШАВАНД

        Кӯлоб, 4 декабр. (АМИТ «Ховар», Сулаймон Холов).- Дар шаҳри Кӯлоби вилояти Хатлон тайи ду соли охир 90 фоизи мактабҳо таъмиру тармим гардида, бо таҷҳизоти зарурӣ муҷаҳҳаз шудаанд. Бояд гуфт, ки дар аксари муассисаҳои таълимӣ лоиҳаҳои Маркази идораи таҷдиди соҳаи маорифи Ҷумҳурии Тоҷикистон амалӣ гардонида шудаанд. Айни замон дар мактаби рақами 22-и шаҳри Кӯлоб, ки ҳанӯз солҳои шастуми асри гузашта сохта шуда буду шароити таълимӣ надорад, таъмири бинои дуюми таълимӣ иборат аз 10 синфхона, утоқи муаллимон ва ошхона мавриди истифода қарор гирифт.         Бояд зикр намуд, ки тибқи Барномаи давлатии таҷдиди соҳаи маориф, дар шаҳри Кӯлоб 20 мактаб зери таъмиру тармим ва азнавсозӣ қарор гирифта, то имрӯз 14-тои он ба истифода дода шудаанд. Лозим ба ёдоварист, ки дар бинои дуюми мактаби рақами 22 дусаду ҳаштод нафар хонанда имкони дар як баст таълим гирифтанро пайдо намуданд. Бинои мазкур бо мизу курсӣ ва таҷҳизоти муосири таълимӣ таъмин гардидааст. Ба гуфтаи мудири маорифи шаҳри Кӯлоб, дар рӯзҳои наздик бинои нави таълимии мактаби рақами 21 низ барои 150 хонанда дар деҳаи Корези Поёни ноҳияи Кӯлоб ба истифода дода мешавад. Он дорои 5 синфхона, утоқи муаллимон ва китобхона мебошад.