МАРОСИМИ ШИНОСОӢ БО КИТОБҲОИ НАВИ БАЧАГОНА

        Душанбе, 30 декабр. (АМИТ «Ховар», Лутфия Эшонқулова).- Бо ташаббуси  Созмони ҷамъиятии байналмилалии  «Истиқбол»  дирӯз дар Иттифоқи нависандагони ҷумҳурӣ маросими шиносоӣ бо 12 китоби нави бачагона баргузор гардид, ки дар давоми соли 2008 ба табъ расидаанд. Директори созмон Латофат Кенҷаева  ба мухбири АМИТ  «Ховар»  гуфт, ки  китобҳои нав дар жанрҳои гуногун, аз ҷумла назму наср, ҳаҷв, афсона ва ғайра навишта шудаанд.                 Яке аз ин китобҳо ба қалами адиби маъруф Салими Зарафшонфар тааллуқ дошта, «Аспи шоҳӣ» ном дорад. Китоб барои бачагон ва наврасон пешбинӣ шудааст. Дар маросими шиносоӣ мудирони боғчаҳои бачагона иштирок доштанд. Онҳо зикр намуданд, ки бачагони хурдсол шеърҳои С.Зарафшонфарро ба осонӣ аз ёд мекунанд. Китобҳои дигар ба  ҷашни 1550 —  солагии  асосгузори адабиёти классики тоҷику форс Абӯабдулло Рӯдакӣ ва панду ҳикматҳои ӯ бахида шудаанд. Бояд гуфт, ки Созмони ҷамъиятии «Истиқбол» дар давоми соли 2008 ба забонҳои англисӣ, чинӣ, туркӣ, русӣ ва ӯзбекӣ 25 китоби бачагонаро дастраси хонандагон гардонд.