МУҲОКИМАИ МАСЪАЛАҲОИ ТАЪМИНИ АМНИЯТИ АФҒОНИСТОН

         Маскав, 2  декабр. АМИТ «Ховар»,   Ҳалима  Хушқадамова). — Дар  Маскав   маҷлиси  шашуми  гурӯҳи  кории  Шӯрои  вазирони   корҳои  хориҷии  мамлакатҳои  аъзои  Созмони аҳдномаи  амнияти  дастаҷамъӣ  бахшида ба  Афғонистон баргузор  гардид. Дар  он  ҳамоҳангсозони  миллӣ  ва  коршиносони  давлатҳои  аъзои  созмони  мазкур  ширкат  варзиданд. Маҷлиси  мазкур   шаҳодат  медиҳад, ки  мамлакатҳои  аъзои  созмон  барои  мӯтадил  гардондани  вазъияти  Афғонистон бо  созмонҳои  байналхалқӣ  ҳамкорӣ  кардан  мехоҳанд. Ҳадафи  ин  мамлакатҳо  барқарор  сохтани  иқтисодиёти  Афғонистон  дар  давраи   баъди  ҷанг  мебошад. Иштирокчиёни  маҷлис  тавсия  доданд, ки кор  бо  намояндагони  Афғонистон  дар  масъалаи  таъмини  амнияти  минтақа  давом   дода  шавад. Ба  мақсад  мувофиқ  дониста  шуд, ки  бо  кӯмаки  СММ  ва  мамлакатҳои  ҳамсоя  барои  бунёди  минтақаҳои  амният  ва  мубориза ба  муқобили  маводи  нашъадор  дар  атрофи  Афғонистон  машваратҳои  иловагӣ  гузаронида  шаванд. Дар  маҷлис  нақшаи  фаъолияти  гурӯҳи  корӣ  барои   нимаи  дуюми  соли  2009  тасдиқ  карда шуд. Маҷлиси  ҳафтуми  гурӯҳи  корӣ  моҳи  апрел  гузаронида  мешавад. Мухбири  АМИТ «Ховар» ёдовар  мешавад, ки  гурӯҳи  кории  СААД  бахшида  ба  Афғонистон  бо  қарори   Шӯрои  амнияти  дастаҷамъӣ  23  июни соли  2005  таъсис  ёфта  буд.