МУДИРОНИ АНБОРҲО, СОҲИЛИ РӮДХОНАРО ДИГАР ИФЛОС НАКУНЕД!

              Бадахшон, 6 декабр. (АМИТ «Ховар», Л.Додо). — Масъалаи тоза нигоҳ доштани муҳити атроф ва мубориза бар зидди олудашавии обу ҳаво сокинони ВМКБ-ро бетараф гузошта наметавонад.              Калонтарин шохаи рӯдхонаи Панҷ — Ғунд аз маркази шаҳри Хоруғ мегузарад. Соҳили рӯдхона ҳамеша пур аз партови гуногун аст.              4-уми ноябр Кумитаи ҳифзи табиат якҷоя бо Раёсати назорати санитарии вилоят вазъи тозагии соҳили рӯдхонаи Ғундро мавриди санҷиш қарор доданд.             Тавре аз Кумитаи ҳифзи табиати вилоят иттилоъ доданд, ба хотири риоя накардани қоидаҳои ҷойгиркунӣ ва безараргардонии партов аз сокинон ба маблағи 1000 сомонӣ ҷарима ситонида шуд. Мудирони анборҳои бозори марказии шаҳр огоҳонида шуданд, ки соҳили рӯдхонаи Ғундро дигар ифлос накунанд.             Кумитаи ҳифзи табиати вилоят ва Раёсати назорати санитарии вилоят ба хулоса омаданд, ки минбаъд моҳе 3 маротиба вазъи тозагии соҳили рӯдхонаи Ғундро дар ҳудуди шаҳри Хоруғ месанҷанд.