МУЛОҚОТ БО НАМОЯНДАИ МУВАҚҚАТИИ ВАКОЛАТДОРИ ҶУМҲУРИИ КУРИЁ

           Душанбе, 27 декабр.(АМИТ «Ховар», Покиза Маҳмадбекова).- Раиси Палатаи савдо  ва саноати ҷумҳурӣ Шариф Саид  дирӯз бо  намояндаи муваққатии ваколатдори Ҷумҳурии Куриё дар Тоҷикистон Ким Хинг Су мулоқот кард. Намояндаи Куриё ба  Ш.Саид дар бораи таассуроташ аз сафари баъзе минтақаҳои мамлакат нақл карда, зикр намуд, ки  Тоҷикистон барои рушди соҳаи энергетика, кишоварзӣ ва туризм  имкониятҳои калон дорад. Шариф Саид ба  мусоҳибаш дар бораи  самтҳои асосӣ ва  афзалиятноки  иқтисодиёти мамлакат маълумот дод, ки ба   сармоягузории хориҷӣ эҳтиёҷ доранд. Вай ҳамчунин дар бораи  афзалиятҳои қонунгузорӣ ва шароити мусоиди сармоягузорӣ дар Тоҷикистон сухан ронд. Сипас ба масъалаи бӯҳрони ҷаҳонии молиявӣ ва тадбирҳои бартараф сохтани оқибатҳои он дахл карда шуд. Мусоҳибон зикр намуданд, ки  мамлакатҳояшон барои густариш додани муносибатҳои тиҷоратию иқтисодӣ имкониятҳои калон доранд.        Шариф  Саид пешниҳод кард, ки бо ин мақсад дар Душанбе намоишгоҳи молҳои истеҳсоли Куриё ва  мулоқоти соҳибкорону тоҷирони ҳар ду кишвар ташкил карда шаванд. Ҳамчунин пешниҳод намуд, ки  мутахассисони тоҷик дар соҳаи  тиҷорат дар мактабҳои олии  Куриё таҳсил кунанд. Меҳмон пешниҳодҳои раиси Палатаи савдо ва саноати Тоҷикистонро маъқул дониста,  ваъда  дод, ки  барои амалӣ сохтани онҳо  кӯшиш ба харҷ хоҳад дод.