МУЛОҚОТИ РАИСИ ПАЛАТАИ САВДО ВА САНОАТИ ҶТ БО СОҲИБКОРОНИ ХОРИҶӢ

        Душанбе, 1 декабр. (АМИТ «Ховар», Покиза Маҳмадбекова).- Раиси Палатаи савдо ва саноати  Тоҷикистон Шариф Саид бо  гурӯҳи намояндагони ширкати  «Билжа отомобилчилик» — и Туркия дар ҳайати  директори ширкат Сокин Билжа ва  муовини ӯ Луқмон Ардагон мудлоқот кард. Дар ҷараёни мулоқот масъалаҳои  рушди  ҳамкории дуҷонибаи тиҷоратию иқтисодӣ баррасӣ шуданд. Ш.Саид ба  сатҳи имрӯзаи муносибатҳои тиҷоратию иқтисодии Тоҷикистону Туркия баҳои баланд дода , зикр намуд, ки  барои густариши онҳо захираю имкониятҳои зиёд мавҷуданд.                Мусоҳибон баъдан масъалаи ҳамкориро  дар соҳаҳои истихроҷи маъдан, мошину дастгоҳсозӣ ва бунёди корхонаҳои  муштараки коркарди пахта  ва пӯсту пашм муҳокима намуданд. Инчунин  масъалаи гузаронидани мулоқоти соҳибкорону тоҷирони ҳар ду кишвар баррасӣ карда шуд. Шариф Саид инчунин бо  менеҷери минтақавии  Палатаи байналхалқии савдо ва саноати Афғонистон Мухлис Аҳмад ва  намояндаи корхонаи «Заря Восток » — и ин мамлакат Маҳбуболлоҳ Розиқӣ мулоқот анҷом дод. Меҳмонон барои шиносоӣ бо шароити фаъолияти соҳибкорӣ дар Тоҷикистон ба Душанбе ташриф овардаанд. Соҳибкорони афғонӣ зикр карданд, ки бисёр соҳибкорону тоҷирони мамлакаташон мехоҳанд фаъолияти худро дар Ҷумҳурии Тоҷикистон дар асоси қонун  ба роҳ андозанд.