МУРҒИМАРҶОНПАРВАРӢ ДАР ВИЛОЯТИ ХАТЛОН

                 Душанбе, 22 декабр. (АМИТ «Ховар», Лаззат Диловарзод).- Бино ба гуфтаи мушовири миллии лоиҳа оид ба тренинг ва гендер Сафаралӣ Наимов, барномаи ташкилоти озуқа ва кишоварзӣ (ФАО) дар 6 ноҳияи вилояти Хатлон амалӣ мешавад. Бо мақсади амалӣ шудани лоиҳа, ки аз се қисм иборат аст, дар навбати аввал 400 нафар занони кӯдакдори бесаробони ноҳияҳои Данғара, Восеъ, Мир Сайид Алии Ҳамадонӣ, Балҷувон ва ноҳияи Ёвон ба гурӯҳи кӯмакгирандагон ворид карда шуданд.                Бо мақсади баланд бардоштани маҳсулнокии чорво, ба занҳои ба гурӯҳи ёригирандагон дохил шуда 2-тогӣ меши бордоршуда ва 5-тогӣ мурғи марҷон дода мешавад.                Тибқи шартҳои лоиҳа, баъди як сол 2 барра ва 5 мурғи марҷонро аз ин гурӯҳ ба гурӯҳи дигари занҳои камбизоат то давраи пурра бо чорвою мурғи марҷон таъмин шудани ҳамаи занони бесаробонмонда дода мешаванд.