НАҚШАИ «ФУРӮШИ БАРҚ» ИҶРО НАШУД. ЧАРО?

              Кӯлоб, 13 декабр. (АМИТ «Ховар», Сулаймон Холов).- Тибқи иттилои сардори ШСХК «Фурӯши барқ»-и минтақаи Кӯлоб Ҳақназар Хоҷаев, тӯли 10 моҳи соли ҷорӣ ҷамъоварии ҳаққи хизматрасонии барқ 59 % -ро ташкил медиҳад, ки ин нисбати маблағи банақшагирифта хеле кам аст.              Ба гуфтаи ҳамин манбаъ, аҳолӣ ва ташкилоту муассисаҳои минтақаи Кӯлоб аз ташкилоти «Фурӯши барқ» 8 млн. 728 ҳазор сомонӣ қарздоранд. Аз ҷумла, Восеъ — 3 млн. 771 ҳазор сомонӣ, Фархор — 1 млн. 728 ҳазор сомонӣ, Ҳамадонӣ — 1 млн. 214 ҳазор сомонӣ, Мӯъминобод — 680 ҳазор сомонӣ, Темурмалик — 398 ҳазор сомонӣ, Ховалинг — 488 ҳазор сомонӣ, Шӯробод — 365 ҳазор сомонӣ, Балҷувон — 82 ҳазор сомонӣ ва ғайра.             Ҳақназар Хоҷаев афзуд, ки сабаби асосии иҷро нагардидани нақша пардохт накардани ҳаққи қувваи барқ аз тарафи Вазорати мелиоратсия ва захираҳои оби Ҷумҳурии Тоҷикистон мебошад. Қарзи ин вазорат ба 5 000 000 сомонӣ расидааст.              Сабаби дигари иҷро нагардидани нақша саривақт пардохт нашудани ҳаққи истифодаи барқ аз тарафи ташкилот ва муассисаҳоест, ки маблағгузорияшон аз буҷаи маҳаллист. Қарзи онҳо ба 360 000 сомонӣ расидааст.              — Қисме аз аҳолӣ хилофи қоидаҳои истифодаи барқ амал мекунанд, ки ин ҳам боиси паст шудани иҷрои нақшаи муассиса мегардад,- гуфт Ҳақназар Хоҷаев.