НИСФИ АҲОЛИИ МАМЛАКАТ АЗ ВОДОПРОВОД ИСТИФОДА НАМЕБАРАД

          Душанбе, 11   декабр. (АМИТ «Ховар»,  Людмила  Дубинина ). –  10  декабр   дар  Душанбе   дар  мавзӯи «Ҳамкории мамлакатҳои Осиёи  Марказӣ  дар  масъалаи  истифодаи  захираҳои  об» семинар баргузор  гардид. Дар  он  доктори  илми  ҷуғрофия,  мудири  озмоишгоҳи  Маркази  илмию  тадқиқотии  ҳифзи  захираҳои  оби  Тоҷикистон  Ӯктам  Муртазоев  маърӯза  кард. Маърӯзаи  ӯ  ба  масъалаи  танзими  маҷрои оби  дарёҳои  сарҳадгузар  ҳамчун  воситаи   ҳамкории  мамлакатҳои  минтақа  бахшида  шуд.  Ӯктам  Муртазоев   баъди  анҷоми  семинар   зимни  сӯҳбат  бо  мухбири  АМИТ «Ховар»  зикр  намуд, ки  ҳадафи  асосии  он  ташкили  гурӯҳи  корӣ бо  мақсади омӯзиши   талабот  ба  беҳтар  сохтани  истифодаи   оби  дарёҳои  сарҳадгузар,  муайян  намудани   ноҳияҳои озмоишӣ   ва таҳияи   барномаҳои  ҳамкории  минтақавӣ  буд, ки  қаблан  ба  ин  масъалаҳо  диққати  зарурӣ  дода  намешуд. Олим   афзуд, ки  айни  ҳол   танҳо  тақрибан  57  фоизи  аҳолии  ҷумҳурӣ  аз  шабакаҳои обрасонӣ (водопровод) истифода  мебараду  халос. Аҳолии  боқимонда  обро   аз  ҷӯю  каналҳо  ва  ҳавзҳо  истифода  мебарад. Дар  натиҷа  бемориҳои  гуногун  дар  байни  аҳолӣ  хеле  зуд  паҳн  мегарданд. Инчунин  аз  рӯи  маълумоти  Муассисаи  наҷоти  атфоли  СММ маълум  гардид, ки  45  фоизи  мактабҳои  мамлакат  бо  оби тоза  таъмин карда  нашудаанд. Ҳол  он  ки Тоҷикистон  аз  ҷиҳати  захираи об  дар миқёси  ҷаҳон  баъди  Чин,  Русия, ИМА,  Бразилия, Зоир, Ҳиндустон ва  Канада  ҷои  ҳаштумро ишғол  менамояд.  Қайд  карда  шуд, ки  нерӯгоҳҳои  барқи  обии  мавҷуда  бе  обанборҳои танзимшаванда  самараи  ночизи  иқтисодӣ  медиҳанд. Бинобар  ин нобаробарии  маҷрои  табиии   дарёҳоро  зимни  сохтмони  нерӯгоҳҳои  барқӣ  то  ҳадди  имкон  кам  кардан  лозим  аст. Илова  бар ин,  бисёр  обанборҳои  нерӯгоҳҳои  барқии  Тоҷикистон ҳам  барои  истеҳсоли  қувваи  барқ ва  ҳам  барои  обёрии  зироат  сохта  мешаванд.  Солҳои гузашта  ба   захира  кардани об   барои обёрии  киштзор  аҳамияти  бештар   дода  мешуд. Ин  аз  бисёр  ҷиҳат   сабаби  кам  гардидани  иқтидори  нерӯгоҳҳои  барқӣ  мегардад, гуфт     Ӯ.Муртазоев.