НОРАСОИИ ОБУ НУРӢ САБАБИ ИҶРО НАШУДАНИ НАҚША

            Душанбе, 2 декабр. (АМИТ «Ховар»,  Лаззат Диловарзод).- Бино ба маълумоти Кумитаи давлатии  омори ҷумҳурӣ, иҷрои нақшаи пахта дар давоми се соли охир наздик ба  сад ҳазор тонна кам гардид, ки ин ба ду нақшаи солонаи ноҳияҳои тобеи ҷумҳурӣ баробар аст. Дар Вазорати кишоварзӣ сабаби паст шудани ҳосил ва иҷро нашудани нақшаи ҷамъоварии пахтаро дар нарасидани обу нурӣ  донистанд. Дар охири моҳи ноябри соли 2006 дар ҷумҳурӣ 439 ҳазору 252 тонна пахта, дар  ҳамин муддат соли 2007 ба миқдори 417  ҳазору 485 тонна ва соли ҷорӣ ба андозаи 339 ҳазору 567 тонна  пахта  ҷамъоварӣ карда шудааст, ки ин нисбат ба соли 2007 ба миқдори  77  ҳазору 918 тонна ва нисбат ба соли 2006 99 ҳазору 685 тонна  камтар аст. Соли 2009 20 ҳазор гектар замини пахта кам карда шуда, аз ин ҳисоб кишти гандум зиёд карда шавад ҳам, нақшаи пахта  550 ҳазор тонна  боқӣ мемонад.