«ОТАШ»-И БЕЛОРУС РИШТАҲОИ ГУСАСТАИ АДАБИЮ ФАРҲАНГИРО МЕПАЙВАНДАД

Душанбе, 10 декабр. (АМИТ «Ховар», Жасмин Назарова) — Шумораи 11-уми маҷаллаи адабӣ – бадеӣ ва сиёсӣ – оммавии Белорус — «Полымя» («Оташ»), ки аз соли 1922 инҷониб нашр мешавад, аз чоп баромад. Ҳайати таҳририя дар баробари нашри намунаи беҳтарини эҷоди адибони белорус, ҳамчунин, қисматеро ба Тоҷикистон бахшидаанд. Раиси интишороти «Адабиёт ва санъат»-и Иттифоқи нависандагони Белорус, адабиётшинос Алес Карлюкович, ки чанде пеш ба Тоҷикистон омада, дар чорабиниҳои форуми III олимон ва адибони кишварҳои ИДМ ширкат варзида буд, баъди бозгашт ба Ватан хотироти сафарашро дар очерки калон рӯи коғаз оварда, ба хонандагони белорус пешниҳод кардааст. Чӣ тавре ки муаллиф мегӯяд, дар бист соли охир бори аввал аст, ки тавассути маҷаллаи овозадори «Полымя» мардуми белорус бо имрӯзи Тоҷикистон, шахсиятҳои маъруфи он, адибону олимони шинохтааш ошно мешаванд. Очерки сафарии адиби Белорус кӯшиши нахустинест дар роҳи аз нав барқарор намудани риштаҳои адабию фарҳангӣ, ки чанд сол муқаддам гусаста шуда буданд. Маҳз бо ташаббуси ӯ ва сарвари нашриёти «Адиб» — Ато Ҳамдам баёзи назму насри адибони ду кишвари ба ҳам дӯст омодаи чоп гардида, аввали соли 2009 ба забони тоҷикӣ ва белорусӣ чоп хоҳанд шуд. Интизор меравад, ки муаррифии ин ду китоби пурарзиш рӯзҳои баргузории намоиши байналмилалии «Китоби Белорус — 2009» дар пойтахти шаҳри Минск баргузор хоҳад шуд.