РУШДИ ИҚТИСОДИЁТИ ҶТ БО ВУҶУДИ БӮҲРОНИ МОЛИЯВИИ ҶАҲ

           Душанбе,  15  декабр.(АМИТ «Ховар»,  Наргис  Бояхмедова). –  Ба  Тоҷикистон  муяссар  шуд,  ки  бо  вуҷуди  тамоили  номатлуби  бар  асари   бӯҳрони  ҷаҳонии  молиявӣ   бамиёномада рушди  иқтисодиёти  худро  таъмин  намояд,  гуфт  Сарвазири  Ҷумҳурии  Тоҷикистон  Оқил  Оқилов  дар  маҷлиси  Шӯрои  байнидавлатии Ҷомеаи  иқтисодии  Евразия, ки   дар  Маскав  баргузор  гардид. Сарвазир  дар  бораи ҳаҷми   хариду  фурӯши мол  дар  байни  Тоҷикистон ва  мамлакатҳои  хориҷӣ  сухан  ронда,  зикр  кард, ки  хаҷми  он  дар  давоми  соли  равон  18  фоиз  афзуд. Айни  ҳол  33  фоизи  хариду  фурӯши мол  дар байни  Тоҷикистон  ва   давлатҳои  хориҷӣ  ба  мамлакатҳои  аъзои  Ҷомеаи  иқтисодии  Евразия  рост  меояд, гуфт   О.Оқилов. Ташкили  Иттифоқи  гумрукҳо  дар  назди  мамлакати мо  имкониятҳои  сифатан  нави  рушди  ҳамкорӣ ва  ҳамгироиро  муҳайё  месозад. Тоҷикистон  ният  дорад, ки  дар  оянда  ба  Иттифоқи  гумрукҳо  ҳамроҳ  шавад. О.Оқилов   дар  бораи  амалӣ  сохтани  барномаҳои  энергетикӣ  сухан  ронда,  қайд  кард, ки  айни  ҳол  бо  ширкатҳои  энергетикии Русия  ва  Қазоқистон  дар  мавзӯи  бунёди  нерӯгоҳҳои  хурду  миёна дар  Тоҷикистон  гуфтушунид  карда  мешавад.  Қайд   карда шуд,  ки  бӯҳрони  ҷаҳонии  молиявӣ  ба иқтисодиёти  Тоҷикистон  низ  таъсири нисбӣ  мерасонад. Сарвазир  ба  иштирокчиёни   маҷлис  пешниҳод  кард, ки   барои  пешгирии  бӯҳрони  молиявии  ҷаҳонӣ ва  то ҳадди  имкон   кам  кардани  оқибатҳои он  сари  вақт  тадбирҳои  дахлдор  андешида,  дар  ҳар  мамлакат  роҳу  усулҳои  самарабахши  иҷрои  қарорҳои  қабулнамудаи  мақомоти  ИДМ   муқаррар  карда  шаванд.