СӮФӢ ДАР САҲНАИ ТЕАТРИ ТОҶИК ҲАНГОС МЕЗАНАД

Душанбе, 3 декабр. (АМИТ «Ховар», Бекназари Абӯбакр). – 2-юми декабр дар Театри академӣ-драмавии ба номи Лоҳутӣ намоишномаи «Офати нафс» аз рӯйи достони «Хари сӯфӣ»-и «Маснавӣ»-и Мавлоно Ҷалолуддини Балхӣ доир шуд. Ин намоишномаро коргардони тоҷик Нуриддини Ҷарронӣ дар жанри гротеск ба саҳна гузоштааст, ки ин барои театри тоҷик падидаи тоза унвон мешавад. Намоишномаи мазкур илҳомест аз достони «Маснавӣ», ки бо омезиш додани воқеияти иҷтимоии замони имрӯза рӯйи саҳна омадааст. Сӯфии ноогоҳ — бозигари аслии ин саҳна, ки аз моли дунё танҳо як хар дорад, дар корвонсарое ба доми фиреби ҷамъе тамаъҷӯй меафтад, ки харашро нахуст бемор ва бар ивази тадовии хараш ӯро қарздор мекунанд. Бар ивази қарзу айшу ишрати суфӣ хар ба савдо меравад. Сӯфӣ, ки сахт дилбастаи хар буд, замоне ба ҳуш меояд, ки хараш ба савдо рафтааст. Сӯфӣ дар ишқи хар мисли он ҳангос мезанад, ё ба истилоҳ «хар мешавад». Ба ҳамин тартиб, нахустин намоишнома дар жанри гротеск дар саҳнаи теати тоҷик ба маърази тамошо гузошта шуд.